Pod Učkun kućice bele

Gervajsovi čakavski stihi danaska su del našeh koreni
i dota ku smo si skupa reditali
Drago Gervais (Opatija, 1904.- Sežana, 1957.) najveći je liburnijski i opatijski pjesnik. Rojen je 18. aprilja na Vrutkeh v Opatije, tu j’ kot otrok proživel srećni dani. Ma, brzo j’ zamračilo, kako j’ sam napisal va svojoj autobiografije, i se j’ to Prva svecka gvera zela. Veli svecki gospodari su se va toj gvere dogovorili i podelili mej sobun zemji a da niki ni niš pital ljudi ki ovdeka bivaju. Tako j’ z Rapalsken ugovoron Opatija prišla pod Taliju. Za ten je more judi moralo poć ća, bežat preko meji na Sušak i pustit svoje kući, se ono ča njin je bilo na srce, njiho, teplo, najtepleje. Mej njimi, va noće kako tat, kako j’ kašneje napisal, bežal je i fantina Drago ki j’ onputa imel lih petnajst let. Familija Gervajs (kako tisto prezime zgovaraju stareji Opatijci ma i Gorani va Severine na Kupe – otkude su koreni tiste familiji) živeje va siromašćine i veloj ubošćine. Prez sega svojga, a va Bakre su dobili i Svjedodžbu siromaštva. Nikada se već nisu vrnuli va svoju kuću na Vrutkeh.
Drago j’ finil gimnaziju na Sušake, a onda j’ študijal za albokata va Zagrebe. Ondje je dofinil jedan del tega študija, a drugi je zištudijal va Ljubljane. Za ten, dela kot mlaji albokatski pripravnik va Crikvenice kade je 1929. leta, va svojen 25. lete živjenja objavil zbirku pjesam Čakavski stihovi. Onputa ti stihi nisu našli nekega velega puta do judi, ma do danaska su postali antologijski i štampani čuda puti, a va knjižarah i antikvarijateh se ne moru ni dobit, aš se zajedno rasprodaju. Gervajsovi čakavski stihi kot ča su ovisti:
Pod Učkun kućice
bele,
miće, kot suzice
vele
danaska su del našeh koreni i dota ku smo reditali.
Drago Gervais je pokle živel va Bjelovare, Zagrebe, a va Drugoj sveckoj gvere se j’ odselil va Beograd. Ondje je bil va šegvite i se j’ družil z drugemi Primorci i Istrijani, kot ča je Ivan Matetić Ronjgov al’ Mate Balota. Kada j’ 1944. leta Beograd oslobojen, Gervais dela va Tanjuge, a pokle finjetka gveri je va šegvite va Ministarstve pomorstva. Na ten dele je premešten v Reku, i tako se j’ 1947. leta, pokle 19 let, vrnul finalmente va svoj rojeni kraj, va svoju Liburniju.
V Opatije biva va jednoj vile na Punta Kolove, ma ne va svojoj rojenoj kuće. Va to vreme započel je pisat svoji dramski teksti, a 1949. leta je postal direhtor Drami teatra „Ivan Zajc“ v Reke. Napisal je devet komedij, a najboja mu je Karolina Riječka. Bil je jako poznat i sagdere su ga jako štimali kot pjesnika i kot čoveka. Čuda j’ delal okol razvitka ovega našega kraja: bil je i predsjednik Turističke zajednici, osnoval je pododbor Matice hrvatske v Reke, pokrenul foj Riječka revija. Pisal je čakavske pjesmi, noveli, eseji, teksti o historije, prevodil je tuji libri, a smiron je pisal va Noven liste. Ma, najveć ga j’ štrukal reški teatar i se svoje forci je onde pustil. O temu nan danaska svedoče njegovi Intendantski dnevniki ke je sam pisal, svojun zelenun tintun. Leta 1954. postal je intendant reškega teatra i tako se j’ do kraja oprtil z brigun i nevojun. Va to vreme je pisal i scenariji za filmi ki su snimljeni a judi su ih voleli gjedat.
Drago j’ va tisto, ne jako lahko vreme, otel da teatar, kultura budu moderni, da gredu va korak z modernen sveton na Zapade. I čuda se je boril za tako ča. Ma, to je veramente teško šlo. A Drago j’ zgubil svojo zdravje.
Na finjetke ivanjskega meseca 1957. leta, kada je Drago bil va pedeset i trećen lete svojga živjenja, otputil se j’ va Sežanu na 50. letnjicu Akademskega društva „Balkan“ kemu je svojni pripadal kako študent va Ljubljane. Onde je bila vela proslava, i Drago j’ ostal prespat va hotele. Va noće, od 30. ivanjskega meseca na prvega jakovaljskega, nesrećno je pal z balkona va ten hotele. Čuda j’ štorij povedeno o temu, pak i danaska, va ovo našo vreme, se ča ki neč špjega.
Ono ča j’ ostalo zapisano kako dokument je tisto da se j’ Drago grdo udril va glavu, pejali su ga va ljubljanski špital, ma ni bilo pomoći. Oteli su ga ča prej vrnut v Opatiju, da umre va svojen rojenen meste ko je tako volel. Ma, to ni bilo moguće va takoven njegoven stanje. Onde je umrl.
Sprogod je bil v Opatije 3. jakovaljskega meseca… Opatija je tri dni plakala za svojen Dragoton… saka j’ kuća znesla črnu zastavu. Za njihega Dragota ki je vavek bil parićan za škerac, za sost na klavire, za žmuj vina, za domaćega čoveka.
Pokrenul je Opatijske ljetne priredbi, iniciral je da se stori ljetna pozornica. I čuda tega drugega.
Njegove čakavske pjesmi su večne i danaska jih judi jako štimaju. H temu, i Gervajsova čakavska kumedija Duhi rada se prikažuje na mićeh i veleh pozornicah.
Sega tega rabi se domislet i sponove pokazat tu lepu dotu ku smo reditali i va ovisten 2024. lete kada se dofinjuje ravno 120. letnjica od Gervajsovega rojenja.
Tako ćemo i ovistu besedu o Dragotu Gervajsu dofinit z pjesmun ku j’ napisala mlada Petra Gržinić va 21. stoleće.

Moj kraj
Va mojen kraje,
Susedi se svajuju,
Ki j kade storil zidić,
I na čigoven terene,
Sme kantat ki tić.
   
Nonice pridu na mašu,
Mesto da Zdravo Marijo kantaju,
One o mićeh penzijah ćakulaju.
   
I da štoriju ča lepše finin;
Pod Učkun kućice bele…
Ma Gervais oprosti mi;
   
Pod Učkun apartmani beli,
Kot sama Učka veli,
Črne šahte, po keh auti kantaju,
I jedan veli buldožer,
Pul kega se cesti kopaju.