Piše: Ada Maršanić
Pročitala san da bite teli da se ča napiše o zajikih s kimi se govori v Riki. Bilo bi lagje da ste šćeto-neto odredili o čemu triba pisat, a ne da napiše ki ča će. Da van pravo rečen ni mi se jako dalo, ali san sakakor tela da j med ričkih zajikih i naš grobnički govor. Vredni Grobničani delajuć va Hateri, na Delti, va Benčiću, Torpedu, Anbalaži, Riju, va Primorju i ča ja znan kadi još fanj su storili da j Rika ono ča j danaska, a to se ne smi pozabit.
Od kuda počet. Najprvo ću napisat da mi j jako drago kad čujen od judih, ki su došli bivat v Riku odsakud kako j evdi lipo i da su v Riki kod doma. Ne reče se samo tako da ki popije vode z naše Ričine ustane pul nas. To j se skupa lipo ali mi se vlasi dižu na glavi kad na onih lipih lunbrelah, na krpenih vrićicah za špežu, na šarih majicah i drugdi već zduga vidin napisano: „Šta da?“ Ki vranić je bil onemu ki j to zmislel? Moje vnuke mi govore da san stara i da to ne razumin aš da tako danas v Riki si govore. Ma sejedno, da van pravo rečen, ovisti ča danaska reču slogan, ne gre mi pa ne gre. Ča nismo z Rike va koj se ne bi smel pozabit naš ČA pa bi lipje zvučalo da ča piše po domaći, ako j već ča takovega zmišjeno.
Dobro to san napisala a sad ću ča drugo. Ovo ča ću napisat ni zišlo z Rike leh ozgora. Gredu nan izbori pa triba poć glasat. Ovo van je živa istina ča ću napisat. Stari judi su fanj držali do tega pa mi j jedanput jedan stariji čovik, umrl je pokoj mu duši, povedal da kad je šal glasat da ni ni ženi rekal kemu j dal glas. Danaska se jako ne drži do tega a glasat triba poć. Poć ću i ja, aš gren saki put, ma ovisti put još ne znan kemu ću dat glas. Pulitika sakamor zabode prsti pa su ča reču izborne jedinice se zmišane. Ma je l to spodobno da oni ki bivaju v Riki glasaju za jednih a mi Grobničani kimi j Rika naš grad moramo glasat za judi za kih nismo nikad čuli, ki bivaju Bog zna kadi i ča će onput oni storit za nas. Neće storit niš kako Bog zapoveda. I onda dojdemo glasat. Čovik bi se smutil med simi onimi hartami i med čuda imenih, aš je stolica slatka. Srića da Novi list uža prvo napisat liste pa moremo oko hititit kemu ćemo dat glas, da nismo tamo kadi se glasa pol ure skriveni zada onih škatul.
A nebogi i oni ki su zibereni. Evo gjedan va onu škatulu kako j Sabor vavik prazan. Ma kako neće bit. Ti nebogi judi su poglavari va svojih općinah, gradih i županijah, va čuda su odborih, delaju po bolnicah i drugdi, imaju familije pa ne dojdu va Sabor aš jih je sran ča nisu ni dnevni red dospeli pročitat. A kako su pametni. Ni ne dojdu va Sabor a se znaju, poznaju si zakoni i va se se razume.
Boje j ne mišat se va pulitiku i mučat pa pustimo to i vrnimo se našoj Riki. Va penziji san pa sad v Riku gren retko a baš i ne volin jako poć. Delala san va strogemu cetru i znala san kadij ča i kako dotamo doć. Sad me j strah poć z auton da se ne zgubin ili razbijen. Ceste po kih se j vozilo ovako sad se vozi onako i se j raskopano. Sakuda se govori kako nan se j vrime prominilo pa zime nisu ono ča su nikad bile, pa ča se ne more počet delat pred jesen i priko zime pa bi se prvo finilo. Ali to su naši posli i mi obični judi tu niš ne moremo storit.
Ada Maršanić rođena je 1948. u Lukežima. Osnovnu školu završila je u Jelenju, a u Rijeci Gimnaziju pedagoškog smjera. Na Ekonomskom fakultetu u Rijeci stekla je zvanje ekonomista. Napisi i prilozi objavljivani su joj u grobničkim zbornicima, Grobničkom listu, Novom listu (…). Za svoju prvu knjigu Prošlost i sadašnjost Općine Jelenje u izdanju Katedre Čakavskog sabora Grobnišćine dobitnica je godišnje nagrade Općine Jelenje za 1997. godinu. Kao posebna izdanja grobničkog zbornika, Katedra Čakavskog sabora Grobnišćine 2010. izdaje joj knjigu o hrani i prehrani na Grobnišćini – Bogatstvo siromaštva. Isti izdavač 2015. izdaje njezinu knjigu Grobnička sakralna baština, koja pruža iscrpan i cjelovit uvid u vjersku i vjerničku tradiciju kao jednu od bitnih okosnica duhovnog identiteta Grobničana i Grobnišćine. Uz sklonost dokumentarnome i egzaktnome, knjige su joj temeljene na relevantnoj literaturi i na vlastitim terenskim istraživanjima. Značajan doprinos Ade Maršanić je i u očuvanju i promoviranju etnografske baštine Grobnišćine. Ponosi se svojom etnografskom zbirkom, a kao sudionik i autor sudjelovala je na brojnim izložbama povezanih uz nekadašnji život i običaje Grobničana. Ostavila je neizbrisiv trag svojih iskustva, istraživanja znanja za buduće generacije koje dolaze.
Istaknuti vizual: Aleš Suk
#100 dugih riječkih jezika #Ada MARŠANIĆ #Grobnik #grobniščina #jezik #nasljeđe
